images
UN
ကိုယ်တိုင်က ပြောင်းလဲမှ ပြောင်းလဲမှုကို မောင်းနှင်နိုင်မည်
| Monday, 08 July 2019
အခြေအနေတစ်ခုကို ပြောင်းလဲပစ်မည်ဟုြေ<ွကးကြော်၊ ကြုံးဝါးသူ များကိုယ်တိုင်က စိတ်ပိုင်း၊ ရုပ်ပိုင်း အားလုံးတို့ကို အောက်ခြေသိမ်း ပြုပြင်ပြောင်းလဲနိုင်ကြပါမှ ထိုအခြေအနေကို ပြောင်းလဲပစ်နိုင်ပါမည်။ မိမိကိုယ်တိုင်က အစဉ်အလာဟောင်း၊ စိတ်ဓာတ်စရိုက်ဟောင်း၊ ပြောနည်း၊ လုပ်နည်းအဟောင်းအတိုင်း စခန်းသွားနေလျှင် ကဗျာဆရာတစ်ဦး၏ ကဗျာလို ''လူလည်းမပြောင်း၊ မူမပြောင်းသည်၊ အဟောင်းတွေနှင့် တရုန်းရုန်း''သာ ဖြစ်နေမည်။
''အတ္တာ ဟိ အတ္တနော နာထော၊ မိမိသည်သာလျှင် မိမိကိုးကွယ်ရာ ဖြစ်''ဟု ဗုဒ္ဓဟောကြားခဲ့သည်။
''မိမိကိုယ်ကိုကောင်းအောင် ကြိုးစားမည်။ မိမိအတန်းကိုကောင်း အောင်ကြိုးစားမည်။ မိမိကျောင်းကို ကောင်းအောင်ကြိုးစားမည်''ဟူသော လူငယ်ကျောင်းသားသီချင်းတစ်ပုဒ် အတိတ်က ခေတ်စားခဲ့သည်။
''ဘယ်သူမပြု မိမိမှု'' ဟု ကိုယ့်ကိုယ်ကိုယ် တာဝန်ခံစိတ်၊ တာဝန် ယူစိတ်ရှိရန် လူကောင်းများကို လေ့ကျင့်ပေးသော ရှေးရိုးစကား ရှိခဲ့သည်။
ယခုနိုင်ငံ၏အခြေအနေမှာလည်း သုံးနှစ်အတွင်း အကောင်းဘက်သို့ မရွေ့ဘဲ ပို၍ဆိုးသောဘက်ဆီသို့သာ နိုင်ငံရေး၊ စီးပွားရေး၊ လူမှုရေး၊ အမျိုးဘာသာ သာသနာရေးများ အားလုံးရွေ့နေသည်။

မြန်မာ့ယဉ်ကျေးမှုကျင့်သုံးသော မြန်မာတိုင်းရင်းသားအားလုံးသည် ယနေ့ခေတ်ကမ္ဘာကြီးထဲ ဝင်ဆံ့ရုံမက နာမည်ဂုဏ်သိက္ခာကောင်းပါ ကျန်ရစ်ရန် အတွက် ကိုယ်ကျင့်သီလကောင်းရှိပြီး အကြမ်းမဖက်ရေး၊ ကိုယ့်ကိုယ်ကိုယ်နှင့် အများကိုပါ အသိပညာပေးသောအလုပ်လည်း လုပ်သင့်လှသည်။
လောဘ ဒေါသ မောဟ အတ္တများသည် မမြဲကြောင်း၊ ဆင်ခြင်ပြီး နေသင့်သည်။ ပြဿနာများ၏ အဓိကသော့ချက်ကို အလျင်အမြန် မြင်နိုင် အောင် ကိုယ့်Óဏ်ပညာကို ကိုယ်တိုင်မြှင့်တင်ထားသင့်သည်။
တိုင်းပြည်မှာ အပြောင်းအလဲများ လုပ်ကြသော်ငြား ယခင်လူတစ်စု ပြီးလျှင် ယခုလူတစ်စုက ပိုတောင်ဆိုးသေးဟု ပြည်သူကယူဆလျှင် တည်ငြိမ်မှု ရှိမည်မဟုတ်ပေ။ ပြည်သူသည် ၁၈၈၅-၁၈၈၆ နောက်ပိုင်း ပါတော်မူကာလမှ နိုးထလာပြီး နယ်ချဲ့ဆန့်ကျင်ရေး၊ အမျိုးသားလွတ်မြောက်ရေး၊ လွတ်လပ်ရေး ကြိုးပမ်းမှုတိုက်ပွဲဖြစ်စဉ်များအတွင်း တက်ြ<ွကစွာပါဝင်ခဲ့ပြီး ယနေ့ထိလည်း ပါဝင်နေဆဲသာ ဖြစ်သည်။
တာဝန်ရှိသူများသည် မိမိတို့၏ လောဘ ဒေါသများကို လျှော့ချသင့် သည်သာ ဖြစ်သည်။ မဟုတ်လျှင် ငါတို့သာလျှင် ပြောင်းလဲချိန်တန် ကယ်တင်ရှင်ဟု ကိုယ့်ကိုယ်ကိုယ် ထင်မှတ်မှားနေလျှင် ပြည်သူမှာ နာပြီး ရင်နာဖို့သာ ရှိသည်။
စိတ်ကောင်းစေတနာကောင်းများ အမြဲမပြတ် မွေးမြူတည်ဆောက် ထားရမည်ဖြစ်ပြီး သတိ ပညာ သမာဓိ ဝီရိယ မေတ္တာ ကရုဏာ မုဒိတာ ဥပေက္ခာ ရှိကြရပါမည်။
အိန္ဒိယခေါင်းဆောင်ကြီး ဂန္ဓီသည် လူတစ်ဖက်သားကို နှိမ့်ချသော အလုပ်ကိုမလုပ်ဘဲ ဂါရဝတရားနှင့် ဂုဏ်တင်၍ ပေါင်းသင်းဆက်ဆံ နေထိုင် သွားခဲ့ရာ နောက်ဆုံး ၄င်း၏ပန်းတိုင်ခရီးသို့ အောင်မြင်စွာ ဆိုက်ရောက်ခဲ့သည်။
မြန်မာ့ယဉ်ကျေးမှုအရ တစ်ဖက်တည်း မကြည့်မြင်ဘဲ နှစ်ဖက်စလုံး ကြည့်မြင်နိုင်ကြဖို့ လိုပါသည်။ အကြောင်းအကျိုး ဆင်ခြင်နိုင်ကြဖို့ လိုပါ သည်။ အားလုံးပေါင်းပြီး အလုပ်လုပ်ကြဖို့သာ အရေးကြီးပါသည်။ ပန်းတိုင် သည် တစ်ခုတည်းသာဖြစ်ပြီး တစ်ချိန်တည်းမှာ ဘက်အားလုံးကို စာနာမှု၊ တရားမျှတမှု၊ သဘောထား ထားပေးဖို့လိုပါမည်။
အသိတရားရှိသည် ဆိုရာတွင်လည်း လူ့အဖွဲ့အစည်း အပြင်ဘက်သို့ ထွက်သွားဖို့ မဟုတ်ဘဲ မိမိကိုယ်ဆီ မိမိပြန်လာဖို့ (Come back to our selves)သာ ဖြစ်သင့်သည်။ အမြဲသတိဖြင့် ဘာကိုလုပ်သင့်သည်။ ဘာကို မလုပ်သင့်ဘူး။ အမြန်သုံးသပ်ဆုံးဖြတ်လုပ်ကိုင်နိုင်ကြဖို့ လိုမည်ဖြစ်ကြောင်းနှင့် ကိုယ်တိုင်ပြောင်းလဲမှ ပြောင်းလဲမှုကို မောင်းနှင်နိုင်မည်ဖြစ်ကြောင်း ရေးသား လိုက်ရပါသည်။
UN
UN